GSDP training hawn a ni

Mizoram Pollution Control Board (MPCB) hnuaia Mizoram EIACP Hub chuan nimin khan Sikulpuikawna Aizawl College-ah 'Green Skill Development Programme (GSDP) training; Certificate Course in Waste Optimization Professional' an buatsaih ṭan a; MPCB chairman Liankima Lailung-in a hawng.

Training course hi Ministry of Environment, Forests & Climate Change hnuaia kalpui tur niin, training tur hian graduate mi 20 thlan an ni. Mithiamten bawlhhlawh hrang hrang sawngbawl dan tur leh tihtlemna kawnga hmalak dan turte an zirtir dawn. Training hi March 5, 2026-ah zawh tura ruahman a ni a; training program-in a tum ber chu ṭhalai lehkhathiam environment lam kaihhnawiha eizawnna tlak thiamna bik nei tura chher chhuah a ni a, training chhuakte hi Green Certificate pek an ni ang.

GSDP hi Skill India Mission of Hon’ble Prime Minister leh Ministry of Environment, Forests & Climate Change ṭangkawpin India ram state hrang hrangah a chhawp chhuak a, he programme hnuaiah hian lehkhathiam hna nei lo kum 18 chunglam tan course hrang hrangah training buatsaihin, Mizoramah chuan Mizoram EIACP Hub-te'n training hi an kalpui dâwn a ni.