Congress sorkarah hmasawnna hmuh tur a awm lo - Zoramthanga

MNF president Zoramthanga chuan, Congress kaihhruai sorkarah hmasawnna hmuh tur a awm lo nia sawiin, "Hei vang hi mipuiin Congress hi an ning tawh," a ti.

Tuikum Block MNF-in nimina Thentlanga conference an neih a hmanpuinaah thu sawiin MNF President chuan, "Kum 2018 inthlan hi mipui hian thleng thuai se la, Congress sorkar paih an chak tawh. Anmahni Congress hnenah pawh hian 'In sorkar leh ang, kawng in siam ṭha si, kohhran nen in relation a ṭha si, development-ah in ṭha bawk si,' ti ila an awih lo reng reng. Min tih-el an ti tlat mai a ni," a ti a; Congress-te chu anmahni pawh sorkar inring tawh loah a puh.

Zoramthanga chuan, Congress sorkar chu pawl hrang hrangin an ning tawh tak zet tih sawiin, "Zirlaite nationalism-ah nasa taka an ṭhanharh avangin Congress an duh lo tulh tulh a. Congress sorkarin sum leh pai leh therh lo hmanga nasa taka hma an lak laia MNF-in mi thar lawm luh tur Zoram hmun hrang hrangah an nei zel hi a lawmawm hle. Pathian leh mipuite zarah kan sorkar leh ngei dawn a ni," a ti.

Conference-ah hian resolution pathum an pass a; MNF president atan Zoramthanga an rin tâwk thu te, an bialtu MLA Lalrinawma enkawl danah an lungawi thute leh, party inthliarna vanga NLUP dawng ve lo miretheite NLUP pe ve tura sorkar an phût thute an tarlang.