Lawngtlai châwmtu tur tui pump ṭan

Greater Lawngtlai Water Supply Scheme (GLWSS) hmangin a vawi khat nan November 30, 2016 zan dar 10 khan tui pump a ni. Tui pump hmasak ber hi PHE minister Zodintluanga'n a enpui.

PHE Minister chuan, Mizoram sorkar hnuaiah hmasawnna chak takin a kal tih sawiin, "Mipui mamawh hmasa berte zinga mi, tui lak bikah hian Lawngtlai WSS, Siaha WSS, Khawzawl WSS, Saiha WSS, Tuipáng WSS, Saitual WSS leh a dangte pawh hawn theih tura puahchah mek a ni," a ti a; tun hnaiah Kelkang WSS (solar pump) an hawn thu leh kar lehah Bilkhawthlir WSS hawng leh an tum thu a sawi.

Zodintluanga chuan, hna thawktute chu ṭhahnemngai tur leh thâ thlah lo tura fuihin, "Mipui tana awm kan nihna hre reng ila, biak nuam leh taima leh lungrual taka hna in thawk ang hian, ni dangah pawh thawk ṭhin turin ka chah duh che u," a ti a; thawktute'n an mamawh an sawite chu a bawhzui tur thu a sawi.

PHE Minister chuan, phal taka tui tihthianghlimna hmun, pipe phûmna leh tuizêm sakna hmun petute an fakawm thu a sawi a; Congress sorkar kum riat chhungin Mizoramah hmasawnna nasa taka kalpui a nih thu sawiin, mahni khua leh district chhunga hmasawnna awm tharte chu eng sorkar siam nge tih inzâwt ṭhin turin mipui a chah.

GLWSS siam tur hian sorkar leh Exelsior Merchants Pvt. Ltd., Kolkata ten April, 30, 2012-ah inremna an siam a, December 2012-ah hna thawh ṭan niin, physical work chu December 2015-ah zawh a ni.

GLWSS-a tui pump chhohna san zawng chu metre 830 a ni a, Chengkawl lui tui lak a ni. Darkar khatah litre 1,28,000 a pump chhuak thei. Tui pump nan kawlphetha 33KV hman a ni a, Lawngtlai mihring 38,455 an nih thlengin mi pakhat zelah ni tin tui litre 40 pe thei tura duan a ni.

Nilaini zana tui pump naah hian minister PC Lalthanliana, MLA Vanlalawmpuii Chawngthu leh PHE Chief Engineer leh officer dangte pawh an tel.