Sangha ei a him; chi-ai tur a ni lo

Health principal director leh Food Safety commissioner Dr K Ropari chuan thuchhuah siamin, hriat theih chinah sangha a ni emaw, thlai lam thil a ni emaw, phai lam aṭanga lak luh ei turah mihring tana hlauhawm khawp Formalin pâi hmuh a la ni lo tih a tarlang a; chî-âi lo turin mipuite a chah.

Food Safety Commi-ssioner thuchhuah chuan, Health department tih-chhuah HRISELNA chan-chinbu, November 2016 chhuaka phai sangha chungchang lo langin mipuite a tithlabár chu pawi an tih thu a tarlang.

Thuchhuah chuan, "Formalin (Formal-deh-yde) hi sangha khawina lam (pisciculture)-ah natna hrik laka sangha venhim nan hman ṭhin a ni a, sangha thawn/hralh chhuah vawn ṭhat-na atan hman phal a ni lo. Hetih lai hian, India ram hmun hrang hrangah sangha hralh chhuah lama sumdawngte'n a vawn ṭhat nan Formalin an hmang fo tih sawi a awm reng a, sawiselna pawh hriat tur a awm reng nghe nghe," a ti.

Mizorama lo lut phai sanghate chu Formalin hmanga sâwngbâwl vek an ni em tih a hriat loh tih sawiin, Commissioner chuan, "A nunga khawi an nih laia kai pawh an ni thei. Health department-a Food Safety Cell-in ei leh in reng renga thil ṭha lo leh hlauhawm awm palh theite bawhzuiin a vil reng a; vawiin thlenga hriat theih chinah sangha a ni emaw, thlai lam thil a ni emaw, mihring tana hlauhawm khawp Formalin pai hmuh a la ni lo," a ti.

Thuchhuah chuan, thil hlauhawm leh fimkhurna tur chi chu mipuite him nan puanzar a ni ṭhin tih tarlangin, HRISELNA chanchinbu November 2016-a thuziak vanga chî-âi lo turin mi tin a chah a ni.