KHAWTHLIR

Silai lem man

Aizawl District Magistrate-in silai lem, a mu kâp chhuak thei leh hâlpuah leh hâlmawi lam chi reng reng zawrh, hralh, leh kawl a khapna thupek bawhzuiin police-te chuan hma an la mek a, dawr hrang hrangte an enfiah ṭhin a, November 28 khan silai lem 42 manin, a zuartute chu thubuai an siamsak. Hetihlai hian Aizawl­a police-te chuan nimin khan hnam dang, ILP nei lo leh hmang dik lote an dap a, mi 46 man­in, Court-ah an thawn.

Mi vit

Lalremruata (25) s/o Lalfinga (L), Zuangtui chuan Nilaini zan khan Armed Venga tlangval pahnih a vit. Armed Veng mi pahnihte hi damdawi-inah dah ve ve an ni a, pakhat chu a ngaihtuahawm deuh. Lalremruata hi Nilaini zan hian an inah a haw a, nimin zing khan police-in an man a, Court remtih­nain jail-ah dah a ni.

Graduation Day

Bualpui khuaa Mission Development Training Centre (MDTC) chuan nimin khan Graduation Day an hmang a, Serlui Presbytery moderator Rev. K Zoramhlua'n fuihna thu a sawi. Kumin hian MTDC aṭang hian carpentry-ah mi 22, veterinary-ah mi 24 leh agriculture & horticulture-ah mi 16 an inzir chhuak a ni.

MAASA khawmpui

Mizoram Audit & Accounts Service Association chuan nimin khan Berawtlangah General Conference vawi 29-na an hmang a, an rorelnaah, 'Accounts & Treasuries, Southern Zone, Lungleiah department quarters a awm ve theih nan hmalak ni rawh se' an ti. MAASA-ah hian member 84 an awm a, audior 33 leh assiatant auditor 51 an ni.

Rokunga Rimawi

Rokunga Memorial Society chuan nimin khan Lammualah Rokunga Rimawi Kût an buatsaih. 1st. MAP Band, 3rd. MAP Band, 39th. Assam Rifles Band, TNT Band, Mizo High School NCC Band leh Salvation Army Bethlehem Corp Band ten Rokunga hlate hmangin pipe leh brass band tumin an entir a ni.