Assam PWD-in Mizoramah kawng an lai Pawl hrang hrangin Assam PWD an dem

2nd December, 2016

Assam PWD-te'n Mizoram chhung, Kanhmun dáiah kawng an lâi tih November 30, 2016 khan hriat chhuah a ni. Assam sorkar thil tih dan chu pawl hrang hrangin an dem thu an chhuah a; ramri chungchangah na zawk leh chak zawka hma la turin Mizoram sorkar an phût.

MZP headquarters, Zawlnuam chuan, November 30 zing dar 8:30 velah Assam PWD-in Mizoram leh Assam inrina Medili lui kânin, Mizoram chhungah Hitachi excavator pahnih leh tipper pahnih hmangin kawng an lâi tih an sawi a; chu chu an hriat veleh Kanhmun V/C member-te leh Kanhmun police-te nen an enfiah nghal tih an tarlang.

Zawlnuam MZP tarlan danin, Assam PWD hnuaia kawng lâitute chu an hnathawh lai titawp tur leh Assam lama kîr turin an ti a, hna thawktute chu harsatna siam loin Assam lamah an let a ni. Assam PWD hian kawngpui metre 100 vel an lai hman.

Assam PWD-in cheibâwl an tum mek kawngpui chu Mizoram UT laiin Mizoram PWD leh Assam PWD-te inbiak remna angin Lowarpoa Sub-Division-in Medili lui (ramri lui) aṭanga Kanhmun lam km. khat leh a chanve, Vanhlira tuikhuah bul thleng an cheibâwl ṭhin. Kum 2008 hnuah erawh chuan kawngpuiah hian Assam leh Mizoram sorkarin kut an thlak lo a, tun hnaiah Mizoram sorkarin kawngpui (KDZKT road) chu a siamṭhat hna an thawk mek a ni.

Zawlnuam MZP chuan, "Hetianga ramri phuailuai leh fel lo lutuka Mizoram a awm reng hi ṭha lo kan ti a, a rang lama ramri buai chingfel turin Mizoram sorkar kan ngen a ni," an ti.

MPC party ṭhalai chuan thuchhuah siam-in, Assam sorkarin ramri pêla Mizoram chhungah bû khuar tuma hma an la fo chu thanat thlak an tih thu an tarlang a, "Ramri humhalh ngam, venghim zo sorkar kan mamawh tawh tak zet a ni," an ti.

MPCY chuan, tun hnaiah Assam PWD-te'n Mizoram mitmei venna leh inthlahrunna nei loa Mizoram chhungah kawng zauh hna an thawk chu dem thu an tarlang a; Kanhmun V/C-te'n theihtawp chhuaha an lo dodal chu fakawm an tih thu an tarlang.

MSU pawhin thuchhuah siamin, Assam PWD-in Medili lui bul Mizoram chhunga kawng an lai chu a hmunah enfiah tumin, an hruaitu pahnih chuan nimin khan Kanhmun an pan thu an tarlang a, "Mizoram leh Assam ramria buaina a awm fo leh Assam sorkar heti taka an huangtau hi ngawi renga enliam mai harsa kan ti a ni," an ti.