Nausen damlo enkawl dan zir

Health department chuan nimin khan Lawng-tlai DC conference hall-ah Lawngtlai district-a ASHA worker-te tan, nausên damlo enkawl dan inzirtirna hun an buatsaih a, Lawngtlai DC Dr A Muthamma-a'n a hmanpui.

Dr A Muthamma chuan, ASHA-te chu hri-selna kawnga a tak taka thawktu an nih avangin an pawimawh hle tih a sawi a, "Tu pawh nu emaw, naute emaw, khawvela piang chhuak tawh phawt chu an hlu a, an nunna veng turin theihtawp kan chhuah tur a ni. Kan district-a naute thihna leh nau chunga nu thihna thleng ṭhin pawh nasa takin a tlahniam tawh a, hei hi hriselna kawnga thawktute thawh rah a ni," a ti.

Workshop hi Lawng-tlai chief medical officer Dr Thani Pachuau-i'n a kaihruai a, Maternal and Child Health-a state nodal officer Dr Zochhuanmawii, UNICEF consultant Dr Anil MH leh Dr Vaibhravrao Patil ten ASHA-te hna thawh tawh dan leh thil pawimawh hrang hrang an zirtir.

Lawngtlai district chhungah hian tun dinhmunah ASHA 178 an awm mek a, workshop-ah hian mi 100 vel an tel a ni.