Kângmei laka damdawi-in himna sawiho

Aizawl DC Kannan Gopinathan chuan, nimin khan Aizawl district chhunga damdawi-in hrang hrang enkawltute a pisaah a ko khawm a, kângmei laka invenna chungchang a sawipui.

Meeting-ah hian, tun hnaia Odisha state-a damdawi-in pakhata kângmei chhuak vanga mi tam tak an thih thu sawi langin, Aizawl DC chuan, Mizorama damdawi-in hrang hrangte pawh an fimkhur a ṭul thu leh, kâng ṭhelhna hmanrua neih bakah, eng emaw vanga kângmei chhuak theite an ven uluk a pawimawh thu a sawi.

Fire & Emergency Service SP pawhin thu sawiin, Fire Safety Audit tih hma ngeiin Fire Protection and Fire Prevention (Essential Handbook in Hospital and Nursing Home) zir chianga lo inbuatsaih turin kalkhawmte a chah a; chumi an peih veleh fire audit turin damdawi-in hotute chu koh theih reng an ni tih a hrilh.