Saikhawthlir RMSA School sak sawifiah

School Education department chuan thuchhuah siamin, Saikhawthlir khuaa RMSA Secondary School building sak mek chungchang an sawifiah a; sikul sak chu a tira ruahman ang taka sak ni lo mah se, a ṭhat tawk thu an tarlang. Sikul sak hi Hachhek Constituency Development Committee (HCDC) chuan sawi-selin thuchhuah pawh an lo siam tawh a ni.

School Education department tarlan danin, Saikhawthlir RMSA School hi Ministry of Human Resource Development (MHRD) Project Approval Board (PAB)-in kum 2013-14 a an pawm tawh a ni a, rokhawlhna avangin November 2015-ah sak ṭan chauh niin, sum ruahman zat chu Rs. 86,44,650.24 a ni.

RMSA school atana DPR reng reng hun chêp tak karah a sakna hmun tur dik tak chiang
taka tihfel a nih hmaa siam a ngaih ṭhin avangin, hmun hrang hranga mi turte chu a inang tlanga siam a ni ṭhin a; chuvang chuan a tak taka thawh a nih hunah a hmun mila tihdanglam hret hret a ngai a, a tira a sak dan tur siam nan a inmil thei lo.

Saikhawthlir RMSA School pawh hmun dangte nen a rualin project siam a ni a; MHRD-a thehluh a nih laiin MHRD hnuaia endiktu consultant-te’n tukverh-a grill dah a tel thei lo tiin an paih vek. Chutih rualin, sikul himna ngaihtuahin pindan pawimawh zual, headmaster room, office, computer room leh a dangteah grill dah ngei ṭula hriat a nih avangin a taka sak huna la siam rem atan consultant-te pawm theih tur zawngin architectural design-ah hian tukverh (ventilation nena inkawp) 72 leh single ventilation 14 dah a ni a, grill erawh chu telh a ni lo.

HCDC-in an sawi angin, a tak takah design-a lang ang zat tukverh leh ventilation zawng zawng vuah a ni lo a, tukverh (ventilation nena inkawp) 54 leh single ventilation pariat chiah vuah a ni tih sawiin, sorkar thuchhuah chuan, “Hei hi a building leh classroom awm dan nen pawh a inmil tâwk tura ngaih a ni,” a ti.

Thuchhuah tarlan danin, National School Sanitation Manual-in a sawi angin, mipa zunna chu naupang 20 tan pakhat zel awm tura tih a ni a; Saikhawthlir RMSA School atan enrolment zat turte ngaihtuahin mipa zun-in pathum a tâwk turah ngaiin, a design-ah pali awm mah se, pathum siam a ni.

School Education department chuan, tukverh, ventilation leh mipa zun-in kim lo chu a bothlau tihna a ni lo tih sawiin, “Heng thil kim ta lo aiah hian a design-a tel lo, sikulin a mamawh sia ngaih tukverh (ventilation nena inkawp) 35-ah leh single ventilation pariatah grill dah a ni ve thung a. Building sak hna hi la zawh loh, hna kal lai mek a ni a, rualbanlote kalna tur (ramp) leh a hma lama step-te chu la siam tur a ni,” an ti.

An tarlan danin, sorkar laipuiin sikul sakna tur sum an pekah a hmunhma laihna leh a panna kawng siamna atan sum dah tam an phal ngai lo a, Saikhawthlir RMSA School sakna atan pawh chutiang atan chuan Rs. 45,474 chiah a pawmsak. Chuti chung chuan project-a tel lo, contractor-in a thawh turah pawh tel lo ni mah se, khawtlang leh sikul tana ṭha zawk tur a nih avangin contractor chu a kawtzawl a zau thei anga lâi tura ngen a ni. Contractor pawhin a hna tur pangngai bakah sikul kawtzawl tur a lai tawh.

Thuchhuah chuan, “HCDC-te duh dan anga project ang diak diaka sikul sak hi a takah a fuh lo zawka hriat a ni a, a hmunhmá leh a taka mamawhna milin, sum bo thlau awm si loin her rem a ni,” a ti. HCDC-te
ṭhahnemngaihna chu lawmawm an tih thu an tarlan rualin, thuchhuah an siam hmain thil awm dan department-ah zawtfiah hmasa ṭhin se an duh thu a tarlang bawk.