Hâlpuah leh halmawi khapna thupek khauh taka kenkawh a ni dawn - SP

Aizawl SP Zosangliana chuan, kumin Krismas leh kumthar hunpui vuakvetah mipui himna atan Aizawl district police-te'n theihtawp an chhuah dawn thu leh, hâlpuah leh halmawi zawrh leh hâl khapna thupek khauh taka kenkawh a nih dawn thu a sawi.

Zosangliana hian tunhnaia MJA office bearer-te nen a pisaa an inkawmnaah, "Boruak thianghlim tak hnuaia Krismas leh kumthar mipuite'n an hman theih nan hâlpuah leh hâlmawi zawrh leh hâl khapna thupek kenkawh a ni dawn a, mipuite sorkar thupekte zâwm a, dan bawhchhe lo turin kan ngen a ni," a ti.

Aizawl SP sawi danin, 2024 Krismas leh kumin 2025 kumthar vuakvêtah Aizawl district-ah halpuah leh halmawi khapna thupek bawhchhia mi 53 man a ni a, thubuai 48 ziah luh a ni. Thubuai siamsak zinga mi 14 chu Court-in thiam loh a chantir a, mi 16 chu a chhuah zalen a; thubuai 17 chu Court-in a ngaihtuah mek thung.

Krismas leh kumthar hunpui mipuite'n rálmuang taka an hman theih nan Aizawl district-ah dan leh thupek kenkawh turin nasa taka hma an lak dawn thu sawiin Zosangliana chuan, "A bik takin Aizawl khawpui chhung veng hrang hrangah leh hmun pawimawh bikahte police duty kan indah dawn a, patrolling pawh nasa zawk tih tum," a ti a; dan leh thupekte ṭha taka zawm turin mipui a ngen.

Aizawl SP chuan, mipuite him taka an bazar theih nan leh puih ngaite ṭanpuina turin Aizawl Bazarpui leh a chhehvelah Police Help Desk an siam leh dawn thu a sawi bawk.