Larsapin Rajya Puraskar Award hlan

Nimin khan larsap Gen Vijay Kumar Singh chuan Raj Bhavan-ah Mizoram Bharat Scouts & Guides (MBSG) in state award a pek theih sang ber, Rajya Puraskar Award/ Governor's Award dawng tura thlan chhuahte hnenah award hi a hlan.

Larsap chuan Rajya Puraskar Award dawng-tute chhuanawm a tih thu sawiin, hmasawnna tur tam tak an la neih avangin an thlen chinah tawp mai loa, ram pum huap scouts & guides chawimawina sang ber - Rastrapati Puraskar dawng thei tura theihtawp chhuah chhunzawm turin a fuih.

Mizote theihna, khawtlang inenkawlna leh nunphung thlirin Rastrapati Puraskar dawng thei tur tam tak an awm theih ngei a beisei thu sawiin Larsap chuan, "Rajya Puraskar dawn hi scouts & guides nuna hlawhtlinna ngaihhlutawm tak a ni," a ti.

Larsap chuan scouts & guides pual camp buatsaih leh classroom aṭanga an thil zirte chuan khua leh tui tha chherchhuah kawngah awmze thui tak a neih thu sawiin, an thiamna leh hriatnate chu faina, chhehvela thil awmte ngaihsakna leh khawtlang rawngbawlsak nana hmang turin a chah.

Rajya Puraskar Award semna puala hun hmanah hian MBSG state chief commissioner H Lalhlingthanga chuan kalkhawmte lawmna thu leh an hmalakna tlangpui a sawi.

Rajya Puraskar Award dawng thei tur hian Tritiya Sopan Level chin tal thlen a ngai. Scouting/guiding skill lama thiamna tha tawk tak nei, vantlang rawngbawlna leh hma-sawnna kaihhnawih hma-laknaa tel tawh bakah Rajya Puraskar Scouts & Guides Testing Camp paltlang tawh an nih angai a ni.

Kum 2024 batch aṭangin Mizoram pumah scouts & guides 149 (scouts 64, guides 85) te'n he chawi-mawina hi an dawng.