State University Demand Committee an lawm; Session hmasa berah bill putluh an ngen

Mizoram State University Demand Committee (MSUDC), Lunglei chuan thuchhuah siamin, chief minister Lalduhoma'n Lungleiah Mizoram State University dah a nih tur thu a sawi chu lawmawm an tih thu an tarlan rualin, Assembly Session hmasa berah bill thar putluh an ngen.

MSUDC chuan November 20, 2025 khan HPC conference hall-ah Chief Minister-in Lungleiah Mizoram State University din a nih tur thu leh Aizawl lama dah tura dan an lo siam tawh tihdanglam a nih tur thu a sawi tih tarlangin, "Lawmawm kan ti hle. CM hi Mizoram hmun hrang hranga hmasawnna rualkhai zawk a thlen theihna tur atana a hmalakna leh zirlaite hmakhua a ngaihtuah avangin fakawm kan ti hle a ni," a ti.

Chief Minsiter a ngenna kal zelah, HPC Vice Chairman V Malsawmtluanga pawhin November 24, 2025 ah Lungleia institution-te upgrade a, state university-in a huamtel (cluster college) theih nana hmalak a nih tur thu a puang lawmawm an tih thu tarlangin MSUDC chuan, CM leh HPC Vice Chairman-ten Lungleiah Mizoram State University din a nih tur thu leh Lungleia institution-te state university-in a huam tel theih nana hmalak a nih tur thu an puan ang ngeia Assembly Session hmasa berah State University Bill thar pu lut a, pawm turin sorkar an ngen.

MSUDC chuan a hlawhtlinna hmel, a taka hmuh a nih hma chuan state university chungchang hi a tawp thleng in an vil chhunzawm zel dawn tarlangin, "Lungleia state university dah a nih theihna atana

kawng hrang hranga kan hmalakna thlawptu leh thawhpuitu, NGO leh kohhran hruaitute bakah chhim mipuite chungah lawmthu kan sawi. Chhim lam aiawh MLA leh minister-te thawhhona leh inpeknate ropui kan tiin lawmthu kan sawi a ni," a ti.