Minister-in MFA Winter Fair, 2025 a hawng

Horticulture minister C Lalsawivunga chuan nimin khan Aijal Club Park-ah Mizoram Florist Association (MFA)-in Horticulture department leh UDPA department bultuma an buatsaih 'MFA Winter Fair, 2025' a hawng.

MFA Winter Fair-ah hian pangpar leh a kaihhnawih chi hrang hrang zawrhna dawr (stall) 121 awmin, December 3, 2025 thleng mipui dawr theih turin an inhawng dawn a ni.

C Lalsawivunga chuan, pangpar khâwitute chu taihmakna leh tih tak takna nen rinawm taka hmalam pan zel turin a chah a, "Pangpar chìn leh hralh chu ram sum dinhmun tihhmasawnna thlenga nghawng nei thei a ni a, ram changkang zawkte pawhin pangpar chìn, enkawl leh hralh chhuahte chu ram eibar intodelhna kawnga hmanraw pawimawh takah an hman ṭhin. Keini pawhin tih tak takna nena kan tih chuan kan thei ve," a ti a; sorkar pawhin hma a lak chhoh mek thu a sawi.

Mizorama pangpar khâwitute tan kâwl a êng chho dawn tih sawiin Horticulture Minister chuan, "Sairanga rél rawn luh hnuah phei chuan rél hmanga phai lama pangpar a thawn theih tawh dawn a, tun hmaa thlawhtheihnaa man to tak taka thawn ngai ṭhin kha tunah chuan rel hmangin awlsam tein a thawn theih tawh dawn," a ti a; pangpar chìn leh enkawl kawngah mipate pawhin tun aia nasaa ṭan an lak a pawimawh thu a sawi bawk.

MFA Winter Fair, 2025 puala pangpar khawi leh potted show intihsiaka ti ṭhate hnenah Minister leh a nupui leh Horticulture department hotute'n lawmman an hlan a ni.