Agriculture Minister pahnih an inkawm

Agriculture minister PC Vanlalruata chuan November 24, Thawhṭanni zan khan Aizawla State Guest House-ah Union minister of state for Agriculture & Farmers’ Welfare Ram Nath Thakur a kawm a; Union Minister chuan, kut hnathawktute harsatnate sukiang turin sorkarin mawhphurhna pawimawh tak a neih thu a sawi.

Ram Nath Thakur chuan, Mizorama hmun ṭhenkhat a tlawhnaa kut hnathawktute tihhmasawnna tura a thil ngaih pawimawhte sawiin, "Agriculture & Farmers' Welfare department hnuaia sorkar laipui scheme hrang hrang chak zawka kalpui a pawimawh a, Siaha district-a kut hnathawktute ka tlawhnaah mi taima leh thawkrim tak takte ka hmuh rualin, hmasawnna nasa zawk an chan theihna turin an harsatnate sukiang turin sorkarin mawh-phurhna pawimawh tak a nei," a ti.

Sorkar laipui kaltlanga Agriculture department hnuaia kut hnathawktute tana ṭanpuina awm ang angte chu a dawngtu turten a hun taka an dawn theih nan thawktute'n ṭan an lak a ṭul thu sawiin Union Minister chuan, "Mizoram chu leilung hausakna ngah tak state a nih avangin hmasawnna chak zawk a awm theih nan heng leilung hausaknate hi hman thiam a pawimawh," a ti bawk.

Minister PC Vanlalruata chuan kut hnathawktute dinhmun chawikan nana sorkai laipui aṭanga ruahmanna ṭha tak tak siam a ni ṭhin chu a lawmthu a sawi a; tung leh cocoa cultivation kalpuina turin sorkar laipuiah ruahmanna thehluh a nih tawh thu leh he ruahmanna hi kalpui vat a nih theih nan theihtawp chhuahpui turin Union Minister chu a sawm a ni.

Inkawmnaah hian Agriculture & Farmers’ Welfare joint secretary Zothantluangi leh director R Lalnunzira te pawhin thu an sawi a; Pachhunga University College zirlaiten hnam lam an entir bawk a ni.