Fisheries Cold Storage Unit hawng

Fisheries minister Lalthansanga chuan nimin khan Ngaizelah Fisheries department hnuaia sangha vawn ṭhatna tura duan Cold Storage Unit a hawng a; sorkar chuan Mizorama thar sangha tharlam tam zawk mipuiin an ei theih nan ruahmanna an siam thu a sawi.

Cold Storage hi Special Assistance to States for Capital Expenditure (SASCE) 2020-2021 chhunga Integrated Fishery and Agro-based Processing Unit component, Horticulture department nodal-na hnuaia din niin, he project atan hian cheng nuai 123 hmuh a ni. Cold storage-ah hian cold chamber pahnih awmin, sangha ton 16 vel vawng ṭha thei tura ruahman a ni a, mipuiin thianghlim leh felfai zawka sangha an lei theihna tur dawr siam tel a ni.

Lalthansanga chuan, Fisheries department-in SASCE hnuaia sangha vawn ṭhatna tur cold storage a din thei chu a lawmthu a sawi a, "Sangha khawi leh a kaihhnawih lama hmasawnna turin sorkar hma a lak mek a, district tina sangha khawituten sangha an neih dan leh an thar zat zirchian a, sangha tam zawk leh lian zawk an thar theih nan department chuan ruahmanna a siam. Mizorama thar sangha tharlam zawk ngei mipuite eitir kan tum a ni," a ti.

Sangha chu sa chhe hma tak leh vawn ṭhat a nih loh chuan hralh tlak loha chhe mai ṭhin a nih avangin cold storage chu sangha khawitu leh zuartute tana hmasawnna pawimawh tak leh ṭangkai tak a nih dawn thu Minister chuan a sawi bawk.

Cold storage hawnna inkhawmah hian Aizawl South II bialtu MLA Lalchhuanthanga, bialtu corporator Dr C Malsawmtluangi leh Kulikawn Local Council hruaitute, Fisheries department hotute an tel.