Fimkhurna Hapta hman ṭan a ni

Nimin zing khan Zoram Drivers' Union (ZDU) buatsaihin an pisa kawtah December 1, 2025 thleng awh tur 44th Road Safety Week (Fimkhurna Hapta) chu Transport minister Vanlalhlana'n a hawng.

Transport Minister chuan November 25 aṭanga December 1 thlenga Road Safety Week hman tur chu mipuite hnena fimkhurna thuchah leh mawhphurhna inhriattirna hun pawimawh tak a nih thu sawiin, " Road safety tih hian lirthei khalhtute chauh huam loin, kawngpui hmangtu zawng zawngte a huam," a ti a, fimkhurna kawngah pawh mitinin mawh kan phurh thu a sawi.

Lirthei khalh laia rilru pek tawk loh vang leh hmanhmawh luat avang vanduaina tawk leh nunna chante an awm thin chu pawi a tih thu sawiin Vanlalhlana chuan, sorkarin vantlang himna tura dan a siamte chu ngai pawimawh zel turin mipuite a chah.

Mizoram hmun hrangah a rualin Road Safety Week hawnna hun hi hman a ni. Zoram Drivers’ Union hmalakna hian lirthei khalh chungchanga Fimkhurna Hapta hi kum 1981 aṭanga khan Drivers’ Week tih hming puin hman ṭan a ni a, kum 2007 aṭangin Road Safety Week tih a thlakin kumtin hman ṭhin a ni.

Record aṭanga a lan danin kum liamtaah India ram pumah road accident vawi 29,000 chuang a thleng. Accident 90% chu driver thiam loh a ni tlangpui ṭhin.