NIT Mizoram Convocation vawi 9-na

National Institute of Technology (NIT) Mizoram chuan nimin khan Lengpui Community Hall-ah Convocation vawi 9-na an hmang a; IIT Guwahati director Prof. Devendra Jalihal chuan khuallian niin a hmanpui a, zirlai graduate thar 185 hnenah certificate hlanin B.Tech Programme thar – chemical science & technology a hawng nghal.

Convocation-ah hian zirlai hlawhtling 185-te hnenah degree certificate hlan an ni a, heng zinga zirlai 137 hi Bachelor of Technology zirlai niin, zirlai 15 hnenah masters of technology degree hlan an nih bakah, mi 33 hnenah doctor of philosophy (PhD) degree hlan a ni.

Prof. Devendra Jalihal chuan zirlai chhuakte chu a lawmpui thu sawiin, "Zirna chu khawvel tihdanglamna atana hman theih tur ralthuam chak ber a ni a, NIT Mizoram hian zirlai zir chhuakte chu technical lama hriatna chauh ni lo in, thil thar siam leh midang kaihhruainaah hma latu ni turin chher ang che u," a ti a; zir chhuakte ram leh hnam tan theihtawp chhuah zel turin a fuih.

Convocation hi NIT Board of Governors chairman Harshavardhan Neotia leh NIT Mizoram director Prof. S Sundar ten an kaihruai a; tarlan danin, NIT Mizoram hi NIRF rank band 101 – 150 an ni a, NIRF score pawh kum hmasa aiin 31%-in a tam tawh. Academic year 2024 – 25 chhung khan NIT Mizoram hian journal ṭha publication 369 a nei a, central funded project 13 neiin, consultancy projects 24 leh patent 12 a nei bawk.