KHAWTHLIR

Apex Bank hawng

Nimin khan Mizoram Cooperative Apex Bank branch 33-na, Vairengte Branch chu Mizoram Cooperative Apex Bank Ltd chairman Lalnunsanga’n a hawng. Lalnunsanga chuan Mizoramah Apex Bank chu bank-in sum a kawl aṭanga loan a pek chhuah tehfung (CD ratio)-ah a sang ber an nih thu sawiin, bank thar chu Vairengte leh a chhehvel khua mipuiten rinawm leh ṭangkai taka an hman a, hmasawnna thlentu pawimawh tak a nih ngei a beisei thu a sawi.

WE guidebook

District Institute of Education & Training (DIET), Aizawl buatsaih Work Education (WE)Guidebook chu DIET Auditorium-ah November 24, Thawhṭanni khan Education minister Dr Vanlalthlana'n a tlangzarh. WE guidebook hi mithiam hrang hrang - DIET, MZU, IASE, MBSE, SCERT, Education Directorate leh he lama mithiam bikten an ziah a ni.

Pa khawi zir

Mushroom Centre, Mizoram Science, Technology & Innovation Council (MISTIC) chuan nimin khan Aibawka BNRGSK Hall-ah ni thum awh tur pa khawi inzirtirna, 'Capacity Building Programme on Mushroom Production & Marketing Strategies' an buatsaih ṭan a, Aizawl South III bialtu MLA Baryl Vanneihsangi'n a hawng.

Dan zirho

Mizoram State Legal Services Authority leh Administrative Training Institute ṭangkawp chuan nimin khan Serchhip DC Pisapui Hall-ah 'Special Awareness Campaign on Legal Provisions and matter for Government Officials of Mizoram' an buatsaih a; bawrhsap Paul L Khuma'n hmanpuiin, "Dan hriatna hian inringtawk taka hnathawh theihna min pe a, dan hmaah chuan hriat lohna hi chhuanlam tling a nih loh avangin kan hriatna kan tihzauh zel a ṭul," a ti.

Minister-in tlawh

Education minister Dr Vanlalthlana chuan nimin khan Khawzawl tlawin, Khawzawl College, Khawzawl Higher Secondary School leh District Education Office-te a tlawh a; thawktute leh zirlaite nen inkawmin, an mamawh leh harsatna an lo thlen hrang hrangahte theihtawp chhuaha hma a lak tur thu a hrilh.