All India service-te special allowance sorkar laipuiin titawp tawh mah se, Mizoram sorkarin a la pe chhunzawm

Sorkar laipuiin all India service-te special allowance a pek ṭhin a titawp a, mahse, Mizoram sorkar chuan a la pe chhunzawm zel thung.

RTI Act hmanga Vanglaini zawhna Finance department-in an chhàn danin, all India service-te special allowance hi September 23, 2022 khan sorkar laipuiin a titawp. Central-in a tihtawp hnuah Mizoram sorkar chuan November 3, 2022 khan tihtawpna order/a ṭul anga hma la tura hriattirna CCA, Account & Treasury-ah a pe ve nghal. Mahse, Mizoram sorkar chuan February 22, 2023 aṭangin special allowance a pe leh a, retrospective date atan September 23, 2022 hman a ni.

Tun dinhmuna all India service officer, North East cadre-te special allowance pek zat chu basic pay aṭanga 20% a ni. February 10, 2009 aṭangin special allowance pek ṭan a ni a, July 25, 2017 hma lam zawngah chuan basic pay aṭanga 25% pek a ni ṭhin.

Tun dinhmunah all India service officer special allowance la Mizoramah mi 83 an awm mek a; all India service officer Mizorama rawn awmte chu an basic pay azirin special allowance an lak a danglam. Tun dinhmuna all India service officer awm mekte'n October 2025-a special allowance an lak zat chu Rs 23,68,620 a ni a, kum khatah Rs 2,84,23,440 a tling.

Mizorama awm nghet all India service officer AGMUT cadre-te pawhin special allowance hi an dawng ve a ni.