Larsap hoin Constitution Day hman a ni; Danpuiin mawhphurhna min pe tel - Larsap

India ramin Danpui a pawmna ní, Constitution Day (Samvidhan Diwas) chu India ram hmun dangte rualin nimin khan Gauhati High Court, Aizawl Bench-ah hman a ni a; khuallian Larsap Gen. Dr Vijay Kumar Singh chuan, Danpuiin mawh-phurhna mipuite a pek tel thu a sawi.

Governor chuan, India Danpui chuan khua leh tuite hnenah dikna leh chanvo a pek rualin, mawhphurhna a pek tel thu sawiin, "A pahniha kan kal kawptir thiam a ṭul. Ram chakna hnar chu dan neih tam lamah ni loin, a kenkawh kawnga mipui inpeknaah a innghat zawk," a ti a; dan lam khawihtu kal khawmte chu a rang lama dikna hlen chhuah a nih theih nan te, ram zalenna tibuai loa mimal zalenna vawnghim tur leh remna leh inunauna vawnhim kawnga theihtawp chhuah turin a chah.

Danpui kaihhruaina hnuaia tun hun thleng thei tura India zinkawng ropui a tih thu sawiin Larsap chuan, "Gauhati High Court Aizawl Bench chuan Mizoram mipuite dikna leh chanvo humhim turin Danpui hnuaiah mawhphurhna pawimawh tak a nei. Danpui nung leh mamawh dan a zir zela her danglam theih nei thei tura Dr BR Ambedkar kaihhruai Constituent Assembly hmalakna a chhuanawm takzet a, India hma lam hun tur thui tak ngaihtuah chungin, kan zavai atana ṭha leh rualkhai taka min phuar khawmtu - dikna, zalenna, intluktlanna leh inunauna min pe thei tur danpui ṭha tak an siam chhuak a ni," a ti.

Gen. VK Singh chuan, Danpui chu mipui thlan rorelna inghahna bulpui a nih thu sawiin, "Court rorel­na hi Danpui hum­himtu a ni. India hmar­chhaka cheng hnam hrang hrangte'n dikna leh zalenna an neih theih nana Gauhati HC sûlhnute a fakawm. Mizorama khawtlang inlungrualna, inrintâwkna leh thla­muang taka chen­hona hi India Danpui thil tum, a taka lantirna pawimawh tak a ni," a ti a; Danpui chu a chhawrtu tur mipui­in an hriatthiam a pawi­mawh thu a sawi.

Gauhati HC judge Justice Marli Vankung pawhin thu sawiin, "Fundamental Duties ṭha taka hlen hi mi tin mawhphurhna a ni. Fundamental Rights ang thoa pawimawh a ni a, dikna leh chanvo lam chauh hriaa mawhphurhna lam ngaihthah hi a fel lo. Kan chanvo leh dikna mai bakah, mawhphurhna Danpuiin min pekte kan zawm ṭhat phawt chuan kan rama harsatna tam takte kan pumpelh thei ang," a ti.

India-in Britain laka zalênna a hmuh khan Danpui (Constitution) siam tur member 299 awmna, Constituent Assembly din a ni a, ni 165 chhungin vawi 11 an ṭhukhawm. Constituent Assembly-in Danpui a duante siamrem hna thawk turin August 29, 1947-ah Drafting Committee din niin, Dr BR Ambedkar chu chairman din a ni.

November 26, 1949-a Constituent Assembly ṭhukhawm chuan India Danpui siam chu lungrual takin an pawm a, January 26, 1950 khan India Danpui chu hman ṭan a ni. Danpui pawm ni, November 26 chu Constitution Day atan hman a ni.