KHAWTHLIR

Thisen pe

Serchhip College-a National Cadet Corps (NCC) chuan November 23, 2025-a NCC Rising Day pualin November 25, Thawhlehni khan thisen pek an huaihawt a, Serchhip District Hospital-ah thisen unit 12 an pe.

AR-in meth man

Assam Rifles chuan November 25, Thawhlehni khan Zokhawthar panna kawngah methamphetamine kg 4.444 an man a, meth neitua Bawi Kanthanga, Myanmar lam mi an man tel nghal. Ruihhlo leh a neitu hi Champhaia Excise & Narcotics department hnenah an hlan a ni.

Sawhthing chungchang rel

Saitual District Agricultural Marketing Committee chu nimin khan additional DC Lal-lawmawma kaihhruaiin an ṭhukhawm. December 5-6, 2025 chhunga Aijal Club, Aizawla Buyers Seller Meet neih turah stall hawn ve an rel a, notified crop aṭangin sawhthing (ginger) sample for chemical residue testing tur lak khawm ni se an ti. Kum 2026 atana supervisor leh coordinator turte an inruat bakah secondary collection centre thar atan Maite khua an pawm bawk.

Pipe phûm mek

Dawrpui Vengthara Nimat building aṭanga Vaivakawn Traffic Point inkar kawngah nizan aṭang khan tuichhe paihna pipe phûm hna thawh a ni a, hna thawh zawh hma chu zan tin dar 9 aṭanga a tuk zing dar 5 thleng kawng chanve khâr ṭhin a nih dawn thu Traffic SP C Vanlalvena chuan a tarlang.

DIET hostel hawng

District Institute of Education and Training, Champhai hostel sak thar chu nimin khan Education minister Dr Vanlalthlana'n a hawng. Champhai DIET hostel hi May 9, 2022-ah sak ṭan niin, March 6, 2024-ah zawh a ni a, Rs 2,18,65,593 sèn a ni. Minister chuan, DIET hmanga zirna a ṭha zawnga danglam chu Mizoramin a hmuh hmaih loh thu a sawi a; zirtirna tidanglamtu leh tihmasawntu an nih theih nan theihtawp chhuah turin zirtirtu leh zirlaite a chah.