Naoatla tui pump-na khawl hawng

PHE minister Prof. Lalnilawma chuan nimin khan Siaha district-a Naoatla Tourist Lodge-ah Naoatla-I leh Naoatla-II khuaa nizung chakna hmanga Vawmtlunglui tui pump-na kháwl a hawng a; tui in tur thianghlim pekah PHE department-in theihtawp an chhuah zel dawn thu a sawi.

Prof. Lalnilawma chuan, "Tui in tur thianghlim pek kawngah PHE department chuan theihtawp kan chhuah zel dawn a, mipui mamawhna chu ṭha taka hlen zel tum a ni. Khawl chhiat vang te, pipe chhiat vang leh thil dang avangin tui pek theih loh chang a awm ṭhin a, hemi kawngah hian mipuite nen inhriatthiam tlan a pawimawh," a ti.

Naoatla I leh II mipuite'n tui thianghlim ṭha tak an nei tur chu a lawmpui thu sawiin PHE Minister chuan, "Khawtlangah hmasawnna rah ṭha a chhuah ngei ka beisei. Tui pump khawl leh tuizem enkawl chu khawtlang kutah thui tak a innghat a, neitu thinlung pu turin ka ngen che u a ni," a ti a; tui pump khawl ṭha tak awm mah se, tui hna a awm lo ang tih a hlauhawm thu sawiin, tui hna humhalh kawngah theihtawp chhuah turin kal khawmte a chah.

Siaha bialtu MLA Dr K Beichhua pawhin thu sawiin, tui thianghlim ṭha tak a awm tur chu a lawm thu a sawi a, "Thianghlimna kawngah hmasawnna a thlen ngei ka beisei a, Naotla khuate'n tui pump khawl leh a dahna tuizem ṭha tak in neih hi neitu thinlung puin enkawl ang che u," a ti. Bialtu MDC N Lalrosanga'n thu a sawi bawk.

Naoatla-I leh Naoatla-II khuaa nizung chakna hmanga Vawmtlunglui tui pump-na tur hian NABARD loan Rs 4,16,84,000 leh state matching share Rs 46,32,000, a vaiin Rs 4,63,16,000 hman a ni. Contractor chu Royal Floria, Zarkawt a ni a, kawlphetha kWp 150.45 pe chhuak thei tur solar plate 255 bun a ni. Ni 20 chhung tui pump enchhin a ni a, mi 2,926 tan minute khatah tui litre 624 pump haw tura duan a ni.

Tuizêm pui ber chu litre 1,20,000 dawng niin, tui litre 7,20,000 dawng tuizem awm sa pangaah sem darh leh a ni a, hna zawh hun tura ruahman chu March 31, 2026 ni mah se, November 10, 2025 khan zawh a ni.