Minister-in jubilee lawmna a hmanpui

School Education minister Dr Vanlalthlana chuan nimin khan Champhai High School golden jubilee lawmna a hmanpui a, November 25, Thawhlehni khan Tualte Primary School centenary lawmna a hmanpui bawk.

Champhai H/S jubilee lawmnaah Dr Vanlalthlana chuan, nakin zela hlawhtling tura theihtawp chhuah turin zirlai leh zirtirtute chahin, "Mihring chuan thil tum kan nei ṭheuh a, chumi tihlawhtling tur chuan mahni ṭheuh kan pawimawh. Zirna hi chakna a ni a, Mizoram chuan human resource a nei ṭha a, chu'ng siamtu chu zirtirtute an ni," a ti a, kawng hrang hranga naupang kaihhruai an thiam theih nan inzir zel turin zirtirtute a chah.

Golden jubilee lawmna inkhawm hi Champhai H/S headmaster Lalhmingthangi Khiangte-in a kaihruai a; School Education director Angela Zothanpuii'n jubilee souvenir 'Tlaizawng' a tlangzarh. Zai leh intihhlimna hrang hrang buat-saih a ni a, tlaiah ruai ṭheh a ni.

Tualte P/S centenary lawm-naah Dr Vanlalthlana chuan centenary lungphun a hawng a; zirlaite chu faina leh hriselna ngai pawimawh tura chahin, Tualte vanglai thleng leh thei tura zirna ngai pawimawh turin a fuih.

Tualte P/S centenary lawmna inkhawm hi Tualte VC president R Lalchhanchhuaha'n a kaihruai a; Khawzawl bawrhsap K Vanlalṭhiana, Samagra Shiksha state project director C Lalthanzira, Khawzawl district education officer Lalrawngbawla leh headmaster i/c F Laldampuia te pawhin thu an sawi a ni.