President leh Mizo zirlaite inkâwm

Assam Rifles buatsaih National Integration Tour hmanga zin mek Mizoram chhim lam district pathuma zirlaite chuan November 25, Thawhlehni khan Rashtrapati Bhavan an tlawh a, president Droupadi Murmu nen an inkâwm.

AR buatsaih Integration Tour hmanga zin mekte hi Lunglei, Siaha leh Lawngtlai district-a sikul zirlai 20 leh zirtirtu pahnih an ni a; November 25-a Rashtrapati Bhavan an tlawhnaah hian President nen an inkâwm a, President chuan an tlawh tawh chanchin te, hlâwkna an hmuh dante a zâwt ani.

President chuan, zirlaite chu India rama hmun pawimawh tak tak an tlawha an thil hmuh leh hriat tharte aṭanga hlâwkna chhar chhuah tum ngei turin a fuih a; an zirlaiah theihtawp chhuah a, hlawhtling ngei tur leh, ram leh hnam tan an theihnate hmang turin a chah bawk.