Kan ram leilung hausakna a thlawnin a luangral nasa hle - EFCC Minister

November 25, Nilaini khan Aijal Club-ah 'Training programme on Integrated Natural Resource Management Strategies for Livelihood Security in Northeast India' buatsaih a ni a, an hun hmanpuitu Environment Forest & Climate Change (EFCC) minister Lalthansanga chuan Mizoram leilung hausakna a thlawna a luanral nasat thu a sawi.

EFCC Minister chuan India hmarchhak ramte hi ramngaw, thing leh mau leh ramhmul damdawi, tuihna, leilung leh nungcha chi hrang hrangahte a hausa em em tih sawiin, "Amaherawh chu, sik leh sa mumal loh vang te, kan hriat tlem avanga kan fimkhur tawk loh vangte leh kan ei leh bar zawnna kawnga kan chin dan ṭha tawk lo avangtein, heng kan hausaknate hi kan haichhuah zawh loh mai bakah a thlawnin a luangral nasa em em. He training hian a tum ber chu mumal taka a ram miten ram leilung hausakna tichhe si loa awmze nei leh hlawk zawka an haichhuah theihna tura thiamna pek hi a ni," a ti.

Training hun chhung hian kalphung dik tak zawm a, ram leilung humhalh chung sia a chhunga hausakna awmte mimal leh khawtlang tana ṭangkai leh chhenfakawma siam dan zirho a ni dawn tih sawiin Lalthansanga chuan, "A bik takin hmeichhiate leh a ram leilung faten he thiamna hi an chhawr ṭangkaia, ei leh bar zawnna ngelnghet leh ṭha zawk an hmuh ngei theih nana duan a ni,” a ti a; training buatsaihtu Centre of Excellence on Sustainable Land Management (CoESLM) chu ram leilung hausakna luangral mai tur leh chhe tur venna kawnga ramchhung mai bakah khawvel huap pawha thiamna thehdarhtute an nih thu a sawi.