Kolasib district-a sorkar hnathawh endik

Mizoram State Project Monitoring Committee (MSPMC) chuan vice chairman R Lalrinawma hoin nimin khan Kolasib district-a sorkar hmalakna leh hmasawnna ruhrel thawh mekte an enfiah.

MSPMC hotute hian khum 100 awmna tur Kolasib District Hospital sak mek te, District Jail thawm ṭhat mek te, Fast Track Court, Revenue staff quarters complex leh DIC Flatted Factory sak mek te, Thingdawla Agriculture Farm-a alu chi dahṭhatna tur Solar Powered Cold Storage leh Seed Processing Unit-te an tlawh. Department aiawhte, contractor-te leh engineer-te nen inkâwmin, an hriat duhte an zawt a ni.

R Lalrinawma chuan, sorkar hmalaknate enfiaha Kolasib-a an kal chhan ber chu, tih dik lohna lai zawng tur ringawt ni loin, hna ṭha zawk leh chak zawka thawh a nih theih nana hmalaknate sawiho tura kal an nih thu a sawi. Hna thawhnaa an harsatnate sawi tur leh sorkara thlen ngai a awm pawhin a ṭul anga an thlensak tur thu hrilhin, "Hna dik leh tlo, sanction a nih ang taka thawh hi tihmakmawh a ni," a ti.