Sorkarin truck neitu leh khalhtute harsatna a hre reng - Transport Minister

Mizoram Truck Owners' Association (MTOA) office thar Bawngkawn a mi chu nimin khan hawn a ni a, a hawngtu Transport minister Vanlalhlana chuan sorkarin truck neitu leh khalhtute harsatna a hriat reng thu a sawi.

Transport Minister chuan truck neitu leh khalhtute chu Mizoram sum chetkual dan (economy) inghahna pawimawh tak an nih thu sawiin, "Mipui nitin mamawh insak bungrua leh bungraw pawimawh chi chi hrang hrang chetvelna kawngah mawhphurna pawimawh tak neitu an ni. Bungrua a bikin, essential commodities phei chu chatlak lova a hun taka a thlen a pawimawh hle. Eng emaw vanga an hna a chatlak palh thinna chuan mipui nitin nunphung a nghawng nasa ṭhin hle a ni," a ti.

Sorkarin truck neitu leh khalhtute harsatna a hria reng thu sawiin Vanlal-hlana chuan, "Kawnpui leh Khamrang inkar kawngpui pawh NHIDCL kutah awm tawh mah se, PWD-in a vilpui ṭhin. Khawthlang lama an mu tan, NH44A hna hmabak pawh ministry-in cheng vbc 134 an rawn sanction tawh a, tunah hian tender chhuah mek a ni," a ti a, NH44A kawng atana 'one time improvement' thawhna tur cheng vbc 48 pawh regional office-ah a inchiah mek thu a sawi.

Vanlalhlana chuan ATL road pawh hna thawh tan theih a nih phat atangin official-te'n hma an la nghal tih sawiin, "Lunglei khawpui chhung kawngpui chu Krismas hmaa blacktop tum a ni a, Aizawl khawchhung resurfacing pawh kalpui mek a ni a, March thla tawp lama zawh theih kan beisei. Supreme Court aṭangin a khat tawkin thil tih tihhlawhtlin tur ruahmanna a rawn siam ṭhin a, tun dinhmunah Speed Limiting Device vuah vek turin a rawn ti," a ti.

MTOA office thar hawn inkhawm hi an president B Lalzarzova'n kaihruaiin, general secretary Dina Tlau tarlan danin, an pawlah hian member 440 an awm.