Kerala press mite Mizoramah an rawn zin; 'Mizoramin hma hun êng tak a nei' - Larsap

Kerala chanchinbumi eng emaw zat chuan Mizoram an rawn tlawh a, nimin khan Raj Bhavan-ah Governor Gen. Dr Vijay Kumar Singh nen an inkâwm. Larsap chuan, Mizoramah industry lian awm lo mah se, Mizoramin hma hun êng tak a neih thu a sawi.

Kerala chanchinbumite hi mi 13 niin, Press Information Bureau (PIB), Cochin bultuma rawn zin an ni a; Ministry of Information & Broadcasting kaltlanga sorkar project hrang hrangte zir chiang turin Assam leh Mizoram an tlawh a ni.

Gen. VK Singh chuan, Mizoram chu state ralmuang, khawtlang nun mawi leh entawn tlak a nih thu a sawi a, "Ziak leh chhiar thiam zaa za awmna leh ami chengte pawh taima tak tak an ni. Mipui tam zawkte eizawnna agriculture a ni a, industry lian nei lo mah se, Mizoramin hma lam hun êng tak a nei. Khualzin hîpna lam, leichi tel lo thlai, sawhthing, aieng, hmarcha, ramhmul damdawi, thlai rimtui, mau leh a dangahte hmasawn turin theihna nasa tak a nei a ni," a ti.

Governor hian tun hnaia Mizorama hmasawnna hnathawhte a sawi lang a; sorkar laipui leh state sorkarin hmasawnna project pawimawh tak tak an siam mek zel tih sawiin, nakin lawkah chuan Mizoramah hmasawnna ruhrel tam zawk hmuh tur a awm dawn thu a sawi.

PIB, Cochin director Dhanya Sanal K pawhin thu sawiin, press tour neih chhan tlangpui a tarlang a; India hmarchhak state-te hre chiang tur leh state sorkar hmalaknate zir chiang tura kal an nih thu a sawi.

Kerala chanchinbumite chuan an chàm chhunga Mizoram an hmuh dante leh hma­sawn zel tura pawimawh nia an hriatte Larsap an hrilh a; traffic dan ṭha taka zawm a ni leh mipui khawsak phung bakah, hmei­chhiate'n khawtlanga hmun pawimawh an chang chu entawn tlak an tih thu te an sawi bawk.

Raj Bhavan-a hun hmannaah hian Kerala chanchinbumite hi Aizawla PIB hotu Rajeev Lourembam chuan a ṭawiawm a ni.

Kerala chanchinbumite hian November 26, 2025 khan Mizoram an rawn thleng a, vawiinah Mizoram an chhuahsan ang. An chàm chhungin Sairang rel chawlhhmun, State Museum, Thenzawla Golf Course & Resort, Breed Development & Conservation Centre for Mithun, Ginger Farm leh Assam Rifles 23 Sector Headquarters te an tlawh a ni.