Minister-in rilru hrisel nei turin a chah

Mizoram Supply Executive Association (MSEA) chuan nimin khan Chaltlang Tourist Lodge-ah General Conference vawi 15-na an hmang a; khuallian Food, Civil Supplies & Consumer Affairs (FCSCA) minister B Lalchhanzova chuan, MESA member-te chu inchhiar zaua inzir zel tur leh rilru hrisel nei turin a chah.

B Lalchhanzova chuan, MSEA chu FCSCA department ang pawha pawl lian leh pawimawh a nih thu a sawi a, "Mipuite'n minister ṭha leh chak anga min hriat ve ṭhinna hi in thawh ṭhat vang leh in ṭhahnemngaihna vang a ni. Kan department hi mipui hnena ei tur petu kan nih avangin kan pawimawh a, mipui tana ṭha lehzuala thawk turin kan inchhiar zau peih a ngai. Thil ṭha tak kan tih zel theih nan kan thiamna hi kan upgrade a ngai a ni," a ti.

Rilru hrisel nei tura kal khawmte chahin Minister chuan, "Tu mah hi famkim kan awm loh rualin, insiamrem thiam zel kan nih a ṭul. Thil kan lo tisual palh a nih pawhin kan insiamṭha ang a, rintlakin kan awm chho zel tur a ni," a ti a; harsatna an neihte ngaithla turin a inpeih reng thu a sawi.

FCSCA Minister chuan, Mizoram State Special Ration Package scheme (ration card sen) hnuaia ration card chu 50,000 aṭangin 1,00,000-ah tihpun tum a nih thu a sawi a; Cabinet-in tun hnaia National Food Security Act (NFSA) dan siamṭhat an pawm tâkah NFSA hnuai awm tur chin bituk (criteria) siam thar a nih thu a sawi bawk.

MESA inkhawmpui hi chawhmaah MESA president CC Sakhawliana'n a kaihruai a; khualzahawm FCSCA secretary Teresy Vanlalhruaii leh khualṭha director Saizikpuii te pawhin thu an sawi. Pension thlahna, member thite sûnna, hruaitu thar thlanna leh rorel inkhawmte neih a ni.