KHAWTHLIR

Golden jubilee lawm

Aibawk Branch YMA chuan nimin khan an kum 50-na, golden jubilee an lawm a, Central YMA president R Lalngheta leh hruaitu dangte'n an hmanpui. R Lalngheta chuan, YMA kumpuan 'Ruihhlo do' kawngah nasa lehzuala ṭang tlang turin YMA member-te a chah a; ram leh hnam ngaihtuaha ram vei tlang turin a fuih bawk.

Meth man

Assam Rifles leh Mizoram Police te chuan November 27, Ningani khan Saitual huam chhunga lrithei an endikna aṭangin methamphetamine kg 5.421 an man a, a neitua puh Thangtinsei, s/o Zamhau, Moreh, Manipur an man tel bawk.

Suspension bridge

Mizoram leh Tripura inkalpawhna Langkaih lei dawh mek vanga mipui harsatna sutkian nan Kheva kai, Kanhmunah auto-rickshaw chin hnuai lam kal theihna lei (suspension bridge) dawh a ni. Mamit SP Manny Bhushan Singh chuan, Kheva kaia suspension bridge-ah hian auto-rickshaw chin hnuai lam lirtheite ṭum khatah pakhat zel chauh tlan phal a nih thu te, ṭum khatah mi 20 aia tam kal phal a nih loh thu te, metric ton 1.5 aia rit zawh phal a nih loh thute a tarlang.

Hunpuiah khap

Mamit bawrhsap K Laltlawmlova chuan thupek chhuahin, Mamit district-ah kumin Krismas leh kum thar 2026 vuakvetah hâlpuah, hâlmawi, melthallâwn (sky lantern) leh puak thei thil dang, boruak ṭha lo siam theite khap a ni tih a puang. Ri bengchheng siam thei chi hrang hrang leh silai lem a mu kap chhuak theite khap a nih thu a tarlang bawk.

Leiṭha man

Siaha district magistrate VL Hruaizela Khiangte chuan thupek chhuahin, phalna (licence) nei lo tan leiṭha (fertilizer) kawl, lak luh leh pek chhuah phal a nih loh thu a puang. Tun hnaiah phalna nei lo hnen aṭangin leiṭha kg. 45 ip 270 man a nih thu leh, leiṭha mante chu Siaha DAO (Fertilizer Inspector) hnen aṭangin lei theih a nih thu a tarlang.

Hmalak dan sawiho

Champhai bawrhsap Mohammad Aaquib kaihhruaiin nimin khan sorkar hotu te, khawtlang hruaitute leh sumdawng pawl aiawhte'n kumin Krismas leh kum thar 2026 vuakveta venhimna kalpui dan tur leh khawpui fai leh thianghlimna tura hmalak chungchang an sawiho. Bawrhsap chuan, ralmuang taka mipuiin hunpui an hman theih nan sorkar, khawtlang hruaitute leh tlawmngai pawlte inkarah thawhhona ṭha a awm a ṭul thu a sawi a; faina leh thianghlimna ngai pawimawh turin mipui a chah bawk.

VC-te kutah hlan

Serchhip District Beautification Project kalpui mekah nimin khan district bawrhsap Paul L Khuma chuan a pisaah Beautification Project hnuaia hmalaknate enkawl chhunzawm zel dan tur 'Operation & maintenance' chu a awmna VC-te hnenah a hlan a; VC-te'n an enkawl zui tawh ang.