Vairengtea kuhva chíngtute'n lawmthu sawi

Vairengte Multipurpose Primary Agricultural Credit Cooperative Society Ltd (MPACS) chuan thuchhuah siamin, sorkar hmalakna avanga ram dang kuhva tawlhruk tihtawp a ni ta leh chumi avanga kuhva tharte ṭha taka an hralh thei ta chu lawmawm an tih thu an tarlang.

Vairengte MPACS (Kuhva Chingtu Pawl) chuan, "Kan manganna leh harsatna hriaa thawhrimna leh vantlang pawmpui tlak eizawnna dinchantir tura sorkar hmalakna avanga smuggling kuhva sumdawnna tihtawp a ni ta mai leh rah chhuah duhawm tak kan hmu ta hi chhuanawn kan tiin, sorkar chungah thinlung takin lawmthu kan sawi a ni," an ti.

Dan loa kuhva tawlhruk vangin Silchar lam tlangdung leh Hachhek tlangdung khuate'n kuhva hralhnaah harsatna an tâwk nasa ṭhin tih sawiin Vairengte MPACS chuan, "Kuhva thar hralh thei loin kan mangang hle ṭhin," an ti a; kuhva tawlhruk tihtawp a nih theih nan an theih ang angin hma la mah se, danchah theih a nih loh avangin an beidawng hman hial thu an sawi.

Vairengte MPACS chuan, kum 2023 tawp lama sorkar thar a din hnuah Home Minister-in smuggling kuhva sumdawnna kal vel khap leh tihtawp a nih tur thu huaisen taka a puan thu an tarlang a, "Kan lawmin kan thlamuanpui hle. Sorkar hmalakna avanga smuggling kuhva sumdawnna tihtawp a ni ta mai leh rah chhuah duhawm tak kan hmu ta hi chhuanawm kan ti... Myanmar kuhva sumdawnna tihtawp a nih avang hian kum hmasa lama kuhva rate kg-ah Rs 20-30 kha kumin 2025-ah chuan Rs 45-55 a kai leh ta a, kan lawm hle a ni," an ti.