Lungleiah Folk Dance & Music Festival

Art & Culture department, Mizo Cultural Artistes' Association Sub-Hqrs Lunglei, Mizoram Independent School Association Sub-Hqrs Lunglei leh Mizoram Teachers' Federation (MTF) District Hqrs Lunglei te chuan nimin khan C Ṭhuamluaia Mualah Folk Dance & Music Festival an buatsaih a; Art & Culture minister C Lalsawivunga'n a hmanpui.

Folk Dance & Music Festival-ah hian sorkar hotu te, pawl hrang hrang hruaitute bakah, sikul 13 aṭangin zirlai leh zirtirtu 900 vel an tel. Zai, rimawi, làm leh lemchan bakah, hnam thuam, rimawi hmanrua leh hnam thil (bungrua) chi hrang hrangte hmangin Mizo hnam nunphung leh ziarang pho chhuaha entir a ni.

Minister C Lalsawivunga chuan, Lungleia hnam làm leh rimawi kût buatsaih a ni leh sikul hrang hrang zirlaite leh MCAA hnuaia club hrang hrangte'n hnam lam leh rimawi hmanga Mizote inpumkhatna tur leh hnam ziarang an entir chu ṭha a tih thu a sawi.

Mizo hnam ziarâng leh thil hlute ngaihhlut leh chawi lâr zel a pawimawh thu sawiin C Lalsawivunga chuan, "Mahni hnam chîn dan hlamchhiah leh kalsan chu hnam ral zia a ni a, hnam upa leh fing apiangin mahni hnam tihphung leh ziarâng an vawng ṭhain an roh ṭhin," a ti.

Art & Culture Minister chuan, zirtirtute chu hun bîk leh kût ní vàng thla chauh loah pawh zirlaite thinlunga hnam rilru leh ziarâng tuh a, hnam làm leh rimawi hrang hrang a tam thei ang ber zirtir turin a fuih a, "An ṭhanhnan theih nan ṭan lak zel a ngai. Kan hnam làm leh rimawi te kan hlut thiama kan vawn ṭhat chuan kum tam tak a liam hnuah pawh kan hnam hi khawvelah pho chhuahin a awm reng dawn a ni," a ti a; rinawmna, dikna, taimakna leh thawhrimna vawng reng turin kal khawmte a chah.