Mizorama Catholic Kohhran Centenary lawm khârna hmang ṭan

Catholic Kohhranin Mizorama kum 100 an tlinna (centenary) kumin chhunga an lawm chu nimin khan Bishops House, Ramthar Vengah a khârna hun an hmang ṭan a, bialtu MLA minister Dr Vanlalthlana'n a hmanpui.

Mizorama Catholic Kohhran centenary lawmna khârnaah hian jubilee dar vuak a ni a, inkhawm nghal a ni. Khârna hun hi vawiin leh naktukah chhunzawm a ni ang. Centenary lawm kharna hi Mizorama Catholic zirna-in hrang hrangah hman a ni bawk.

Minister Dr Vanlalthlana chuan, Mizoramah Catholic Kohhranin zirna kaltlangin danglamna nasa a thlen tih sawiin, "Education an kalpui dan pawh sorkar thlengin kan entawn a ni. Catholic zirna-inte'n co-curricular activity uar taka a kalpui dan hian zirlaite hma lam hunah nasa takin a ṭanpui a, state páwna kal chhuah thlengin mahni inrintâwkna a pe ṭhin," a ti a; Pathiana innghat tlat chunga hmasawn zel turin duhsakna a hlan a ni.