CM-in Silver Elephant Award a dawng

Chief minister Lalduhoma chuan November 28, 2025 khan Bharat Scout & Guides chawimawina sang ber Silver Elephant Award a dawng. CM chuan, Award a dawn chu ama mimal hlawhtlinna ni loin, Mizoram mipui hlawh chhuah zawk a nih thu a sawi.

CM Lalduhoma hi Uttar Pradesh khawpui Lucknow-a Bharat Scout & Guides kum 60 tlin lawmna leh 19th National Jamboree hmannaah a tel a; President Droupadi Murmu, Uttar Pradesh chief minister Yogi Adityanath leh mi pawimawh dangte pawh an tel.

Bharat Scout & Guides 19th National Jamboree-ah hian Lalduhoma hnenah Bharat Scout & Guides Silver Elephant Award hlan a ni. Chawimawina lehkhaah, CM Lalduhoma hnena chawimawina hlan chhan chu, Bharat Scout & Guides hmalaknaa a thawh ṭhat chungchuan vang (most exceptional service) a nih thu ziah a ni.

CM Lalduhoma hi Mizo zinga Silver Elephant Award dawng pariatna a nia hriat a ni a; Mizo zinga dawng hmasa ber chu Hrangthanga (L) niin, kum 2000 khan a dawng a, Lalduhoma hmaa a dawng hnuhnung ber chu Lalrosangi niin, kum 2017 khan a dawng.

Lalduhoma chuan, "Mizoram mipui, khua leh tui ṭha, ram leh khawtlang tana inpe zo em em, mi dangte nena thawhho thiam, mahni inphata mi dangte ṭanpui tura inpeih reng ṭhinte vangin he chawimawina hi min pe niin ka hria. Keima mimal hlawhtlinnaah ka ngai lo a, Mizoram mipui hlawh chhuah zawk a ni," a ti a; Mizorama Bharat Scout & Guides hotute leh Sports & Youth Services department-a a thawhpuite thawhrimnaah a lawm thu a sawi.