Revd Dr Chuauṭhuama hnenah Academy Award hlan a ni

Mizo Academy of Letters (MAL) chuan November 29, Inrinni khan Assembly Annexe conference hall-ah Kum Tawp Inkhawmpui an hmang a; thu leh hla lama thawh hlâwkte hnena kum thum dana chawimawina an pek ṭhin 'Academy Award' chu Revd Dr Chuauṭhuama (L) an hlan.

Inkhawmpui hi MAL vice president Prof. Rualkhuma Colney-in a kaihruai a; khuallian Lalbiakzama, Assembly speaker-in Academy Award 2025 chu Revd Chuauṭhuama (L) nupui Lalchhumi hnenah a hlan a ni.

Lalbiakzama chuan, Mizo thu leh hla hmasawnna atana MAL hnathawhte ropui a tih thu a sawi a; kum tina lehkhabu chhuak ṭha ber Book of the Year leh thu leh hla lama thawh hlâwkte hnena Academy Award an hlan ṭhin chu ropui a tih thu a sawi bawk.

Assembly Speaker hian MAL 'Thu leh Hla' chanchinbu kum 60-na Special Issue te, Dr Darchuailova Renthlei lehkhabu 'Tlang Thawveng 2' leh Lalsangpuii lehkhabu 'Lawhlei' te a tlangzarh nghal a ni.

Revd Chuauṭhuama fanu Dr Elsa Lalramzauvi pawhin thu sawiin, a pain Academy Award a dawng chu ropui a tih thu leh, a pa la dam se chuan a thil ngaihhlut ber zinga mi a nih a rin thu a sawi a, "Ka pa thu min chah ṭhin, dikna hi ram leh khawtlangah i chawi sang zel ang u," a ti.

Academy Award hi kum 1997 khan hlan ṭan a ni a; thih hnu (posthumous)-a dawng mi pali - KC Lalvunga (Zikpuii Pa), Rev. Dr Zairema, L Keivom leh Revd Dr Chuauṭhuama an awm ta a ni.

MAL Inkhawmpuiah hian chawhnuah an president Prof. RL Thanmawia kaihruaiin rorel a ni a; an pawl hming 'Mizo Academy of Letters' tih chu 'Mizo Thu leh Hla Inpui' (MIzo Academy of Letters) tia vuah an rel. MAL chhunga hman tur bik Mizo thumal chher thar eng emaw zat an pawm bawk.

Mizoram Journalists' Association kaihhruaiin kum 2025-2027 chhunga MAL hruaitu tur an thlang a; president-ah Prof. RL Thanmawia, vice president-ah Prof. Rualkhuma Colney, general secretary-ah Dr Zoramdinthara, Assistant general secretary-ah Dr H Laldinmawia, treasurer-ah Dr Dorothy Zonunsangi leh finance secretary-ah Lalsangpuii te an thlang a ni.