KHAWTHLIR

Thisen pe

November 29, Inrinni khan Bethlehem Vengthlang Branch YMA chuan an YMA Hall-ah Civil Hospital, Aizawl tan thisen unit 36 an pe a, petute mipa 29 leh hmeichhia pasarih an ni. KṬP, Airfield Vengthar Bialin Inrinni vêk khan Synod Hospital tan thisen unit 23 an pe a, petute mipa 20 leh hmeichhia pathum an ni. ṬKP, Thenzawl Bial leh SAY, Central South Division te pawhin a huhoin thisen pek an huaihawt a, Serchhip District Hospital tan unit 34 pein, petute mipa 26 leh hmeichhia pariat an ni.

LADC campaign hun tâwp dawn

Lai Autonomous District Council (LADC) inthlanpui December 3, Nilainia neih turah vawiin tlai dar 4 hian campaign theih hun a tawp dawn. Lawngtlai district election officer Donny Lalruatsanga chuan thuchhuah siamin, campaign theih tawp loh hun, 'silent period' chhungin mimal, pawl, political party anga inthlan campaign kaihhnawih tih khap a nih thu leh, LADC-a vote nei lo tan LADC chhuahsan vek tur a nih thu a tarlang.

EFCI conference

Evangelical Free Church of India (EFCI) Mizoram Regional Headquarters chuan November 28 aṭanga nizan thleng khan Vairengte Chhimveng biak-inah Regional Joint Conference vawi khatna an buatsaih a, thupui chu 'Inpumkhatna' tih a ni. EFCI Mizoram Region-ah hian presbytery panga - Aizawl, Khawlian, Kolasib, Lunglei leh Sakawrdai te a awm mek a, kum 2024 inchhiarnaah member 13,451, pastor 22, kohhran upa 195 leh tualchhung kohhran 48 an awm a ni.

Centenary lawm

West Phaileng Presbyterian Kohhran chuan an kum 100-na November 29, Inrinni khan an lawm a, Synod moderator Rev. RC Lalnghakliana'n hmanpuiin, centenary lungphun a hawng. Centenary lawmnaah hian West Phaileng pastor leh probationary pastor ni tawh leh kohhrana lawi tawh mi eng emaw zatin an hmanpui a, centenary lawmna ruai an ṭheh. West Phaileng Kohhran hi kum 1925-ah din a ni a, member 585 an awm mek a ni.

No Tobacco Week

UPC (NEI) Aizawl East District chuan December 1-7, 2025 chhungin No Tobacco Week an hmang dawn a, UPC (NEI) general Secretary Rev. Lalmalsawma Sailo-in zanin hian Headquarters Kohhran Biak-inah a hawng ang. Tualchhung kohhran tinte chu urhsûn taka hmang tura ngen an ni a; nizan khan Aizawl East District-a kohhran tinah Week thuchah chhiar niin, kumin week thupui chu 'In thianghlim tur a ni, kei, Lalpa in Pathian hi ka thianghlim si a,' tih a ni.

Pavilion hawng

Aizawl Municipal Corporation (AMC) Ward-XIV corporator Ramthanzauvi chuan a bial chhung Khatla New Capital Complex-a basketball court pavilion siam thar chu November 29, Inrinni zing khan a hawng. Pavilion siamna atan hian AMC Property Tax Return Rs 2,00,000 hman a ni a; zunram thiarna siamna atan Rs 1,00,000 a pek leh tur thu Ramthanzauvi chuan a sawi.

Serchhip ZDU golden jubilee

Zoram Drivers Union (ZDU), Serchhip Sub-Headquarters chuan November 29, Inrinni khan Serchhip Tuikhuah venga ZDU Rûnah golden jubilee an lawm a, district bawrhsap Paul L Khuma'n hmanpuiin, jubilee lungphun a hawng.