LADC inthlana duty-te awmna tur thliar

December 3, 2025-a Lai Autonomous District Council (LADC) inthlanpui neih tura inthlan buaipuitu polling official-te awmna tur nimin chawhnu khan DC pisaah khawl hmangin thliar a ni a, hei hi polling official randomization thawh thumna a ni.

State Election Commission ruahman angin polling official randomisation hi a hmain ṭum hnih buatsaih a lo ni tawh a, nimin chawhnu khan a thawh thumna leh a hnuhnung ber neih leh a ni. Heti hian polling official-te duty-na tur tihchian a ni tawh a, hmun hla deuh leh kal harsa deuha duty turte chuan vawiin hian an duty-na tur an pan tawh ang.

LADC inthlanpui atana din Lawngtlai District Standing Committee chu November 29, Inrinni khan an chairman Donny Lalruatsanga, bawrhsap hoin DC conference hall-ah an ṭhukhawm a; Bawrhsap chuan, political party, tlawmngai pawl leh mipuite chu thawhpuiah a sáwm.

Donny Lalruatsang chuan, inthlanna felfai neih a nih theih nan Election official-te'n theihtawp an chhuah thu a sawi a, "NGO-te nen thawhhona ṭha tak a awm a, a lawmawm. Khauh takin Model Code of Conduct kalpui mek a ni a, political party lam pawhin an zâwm ṭha hle niin kan hria. Inthlanna lo awm turah kawng engkimah infinchhuah tawn a ṭul a ni," a ti.

Lawngtlai SP PC Lalchunglura tarlan danin, dan leh thupek kenkawh turin duty turte ruat vek tawh a ni a, a ṭul dan azira indah belh ngaite pawh dah belh zel a ni dawn. Election officer Collin Hlychho chuan, polling party tan training vawi hnih neih a nih tawh thu leh December 1 (vawiin) aṭangin an duty-na tur hmun pana an chhuah ṭan dawn thu a sawi.