Hna thawh tur chiang hmasa turin chah

Andaman and Nicobar Islands Mizo Welfare Association (ANIMWA) chuan thuchuah siamin, Andaman and Nicobar Islands hna thawk tura kal tumte chu an thawhna tur leh hlawh tur zat hre chiang hmasa tur te, Mizo hmai tibâl zawnga khawsa lo turtein an chah.

ANIMWA chuan, "Andaman and Nicobar Islands-a hnathawk tura lo kal turte'n kan hnathawhna hmun hriat chian te, kan hnathawh tur tak hriat chian mai bakah, kan hlawh zat turte thlenga hriat chian hmasak zet hnua lo chhuk chauh ṭhin ni se," an ti.

Hun kal tawhah Mizo hnam hmai tibâl zawnga khawsa an awm tawh ṭhin tih sawiin ANIMWA chuan, "Tun hnuah Mizo hnam timualpho zawnga khawsakna a awm leh a nih chuan an chhungte leh an khawtlang hruaitute nen ṭanghoa thawn haw an ni tawh ang," an ti a; Mizo hmai tibâl zawnga khawsa awm tawh lo se an duh thu an tarlang.

ANIMWA chuan, Andaman & Nicobar Islands chu zîm tê a ni a, Mizo awmte pawh hriat bik an awl thu an tarlang a; Mizo pahnih khat awm ṭha duh lo vanga hnam hminghliauna leh Mizo dangte harsatna thlen theitu an ni tih inhriain, Zoram lam aṭanga hna thawk tura lo kal leh turte chu Mizo tlawmngaihna leh Kristian nun dah sannate nena kal turin an ngen a ni.

ANIMWA hian Andaman & Nicobar Islands-a hna thawk tura chhuk tharte chu ANIMWA hruaitute emaw, Mizo Diasporahub application emaw hmanga inhriattir vat tur leh Mizo Welfare bèl tlat turin an chah a; "ANIMWA-in Mizo ṭanpui ngai leh chhawmdawl ngaite ṭanpuiin a lo chhawmdawl tawh ṭhin angin, he rawngbawl hna hi a thawk reng dawn a ni," an ti.