December 1 - World AIDS Day

Vawiin December 1 hi World AIDS Day a ni a, Mizoram hmun hrang hrangah hman a ni dawn. He ni pual hian Kolasib-ah chuan November 29, Inrinni zing khan Venglai YMA Park-ah ‘Harsatna kara AIDS hmachhawn dan thar’ tih thupui hmangin hun hman a ni a, bawrhsap Robert C Lalhmangaiha'n a hmanpui.

Robert C Lalhmangaiha chuan, AIDS chungchanga Mizoram dinhmun a chhuanawm loh thu a sawi a, "Mi tinin nun kan uluk a ngai. Hunpui kan hmachhawn dawn a, heng hunahte hian he natna ṭha lo vei palh theihna a sang a, kan ṭanrual a ngai. AIDS laka kan himna turin hriselna lama thawktute thurâwn leh thupekte kan ngaih pawimawh a ṭul," a ti.

Kolasib chief medical officer Dr RK Lalthlamuana chuan, Kolasib district-ah hian HIV chungchanga hmalakna chu kum 2002 aṭanga ṭan a nih thu sawiin, "June 2002 aṭanga October 2025 thlengin mi nuai chuang thisen test zingah chuan mi 2,006 laiin AIDS an vei tih hmuh chhuah a ni," a ti a; World AIDS Day chu December 1 ni mah se, chhan eng emaw avangin November 29-ah an hman thu a sawi.