First-aid pek inzirtirna video tlangzarh

Indian Red Cross Society (IRCS), Mizoram State Branch chuan November 29, Inrinni khan an president Governor Gen. Dr Vijay Kumar Singh hoin Raj Bhavan-ah Annual General Meeting hmasa ber an hmang. Larsap hian IRCS, Mizoram State Branch, IPR department leh ZMCH te ṭangho buatsaih first-aid pek dan inzirtirna (tutorial) video paruk a tlangzarh.

Gen. VK Singh chuan, IRCS Mizoram State Branch-ah member tam zawk leh hmalakna tam zawk a awm nih theih nan Red Cross Society awmzia, kalphung leh hlawknate puanzar tam a ṭul thu a sawi a; rîkrum thil a thlena che chhuak thei tura Mizo ṭawnga inzirtirna (first aid tutorial video) siam chu mipuiin ṭangkai taka an hman a beisei thu a sawi bawk.

IRCS, Mizoram State Branch-ah hian life member 18 an awm a; Aizawla college pathum - Aizawl College, Aizawl North College leh T Romana College aṭangin Youth Red Cross unit member 100 chuang an awm mek a ni.