Champhaia bûkna endiknaah mi 5 man, office-ah mi 7 an ko

Champhaia Legal Metrology hotute leh Champhai District Consumers Union chuan November 29, Inrinni khan Champhai khawpuia bazar hrang hrangah bûkna an endik a; bûk tling lo leh mau hmanga bûkna hmang mi panga an man a, Legal Metrology office-a tihfel ngai tifel turin mi pasarih an ko bawk.

Bûkna endiknaah hian Legal Metrology assistant controller Lalfakzuala leh inspector Felix Lalruatsanga hoin thawktu dang pali an tel a, District Consumer Union aṭangin president C Lalthawmliana leh office bearer dang panga an tel. Sa leh thlai hrang hrang bûkna an endik a, bawngsa leh vawksa bûknate chu a tling ṭha hle niin sorkar thuchhuah chuan a tarlang.

Mipuite'n bûk tling ngeia sa leh thlai an lei theih nan hma an lak zel dawn thu leh a ṭul anga an endik zel dawn thu Legal Metrology hotute leh Champhai District Consumer Union hruaitute chuan an sawi.