Bana Kaihna dawngtu zinga 90%-in an thawk ṭhaah ngai

Mizoram State Policy Coordination Committee chu nimin khan an chairman Lalduhoma, chief minister hoin CMO conference hall-ah an ṭhu a, an hmalaknate an thlir lêt. Bâna Kaih (Handholding) scheme kalpui tawh zinga endik tawh chinah 90% chuan an ti ṭha tâwkah an ngai.

CM Lalduhoma chuan, Bána Kaih scheme chu sorkar flagship programme a nih thu a sawi a; department-te chu an ni tin hnathawhnaah flagship scheme thilte ngai pawimawh hmasa ṭhin turin a chah.

Ṭhutkhawmah hian DDK, Aizawlin sorkar flagship programme-a thawhho an rawtna an ngaithla, an rawtna zir chiangtu tur team an din nghal a, a rang lama thutlukna siam a ni ang. Bána Kaih hnuaiah thawhpui bank tam zawk an awm theih nan hmalak an rêl a, a rang lama bawhzui ni se, an ti.

Cooperation department-in Bána Kaih hnuaia pawlin a dil theih loan dilna an thehluh project 18 an thlir a, project an ngaih pawimawh dan indawt siam hmasa turin Cooperation department an chah.

Animal Insurance Scheme (Livestock Insurance Scheme) hmalakna ngaihthlak a ni a, a thawh khat nan ran 3,300 vel huama kalpui phawt an rel. AH&Vety hnuaiah progress partner mi 1,010 an awm mek a, a tam zawkin vawk vulh an thlang a ni.

Animal Insurance chu National Livestock Mission hnuaia kal pui tur a nih angin, guidelines ang chuan central leh state sorkar tum tur bakah, beneficiary contribution a tel. Mahse, Handholding progress partner-te'n insurance an tihna tura an tum ve tur chu Bana Kaih aṭanga tumsak ni se, an ti.

Bank-te aṭangin loan component hnuaia loan dawng tura rawt tawh, la dawng si lote dawn loh chhan ngaihthlak a ni. Loan pek tawh 287, bawhzui mek (pending) 280 leh en ṭhat leh tura bank-te'n an thawn kir (returned) 113 an awm a ni.