KHAWTHLIR

Zarda lem man

Mizoram Police leh Baba Vigilance team ṭang dun chuan nimin khan Zarkawtah Baba Zarda lem (duplicate) eng emaw zat an man. Zarda lem an manna hi Samim s/o Kishna Deb, Zarkawt leh Milon Ahamad s/o Abdul Satar te an ni a, Copyright Act 62/63 Section 318 hmangin hrem an ni.

Hunpui inbuatsaihna

Aizawl bawrhsap Lalhriatpuia hoin nimin khan sorkar hotu te, local council leh Central YMA hruaitute DC conference hall-ah an ṭhukhawm a, Aizawl district mipuiin thlamuang taka Krismas leh kum thar 2026 an hman theih dan tur an ngaihtuah. Dan leh thupek kenkawh chungchang, mipui himna tura ruahmanna chi hrang hrang te, traffic thâwl leh mumal zawka enkawl dan tur leh, sorkar leh tlawmngai pawlte felfai zawka thawhho dan turte sawiho a ni.

Kawng khâr dawn

Chanmari West leh Vaivakawn Traffic Point inkar kawng thawm ṭhat ṭan a ni a, hei vang nimin aṭanga December 5, 2025 thleng zan dar 9 aṭanga zing dar 5 thleng kawng khâr ṭhin a ni dawn tih Traffic SP C Vanlalvena'n a tarlang. Tlangnuam Hridaikawn - Saikhamakawn inkar kawng pawh December 4, 2025 thleng siam a nih dawn avangin zan dar 9 aṭanga zing dar 7 inkarah khar ṭhin a nih dawn bawk.

Bâna Kaih sawiho

Hnahthial additional DC Zothanmawia Khiangte kaihhruaiin nimin khan Bána Kaih (Handholding) hnuaia Hnahthial district-a loan assistant pek tur chungchang sawiho a ni a, Hnahthial district-ah loan assistant dawng turin mi 17 thlan an nih thu tarlan a ni.

Online-a entry tax pekna hmang ṭan

State dang aṭanga Mizorama sumdawnna lirthei (commercial vehicle) lo lutte'n awlsam zawka entry tax an pek theihna tura ruahman, 'Online Border Check Post Module' chu Mizoramah hman ṭan a ni dawn a; Module pualin nimin khan Transport conference hall-ah hun hman a ni. Transport director R Lalrammawia chuan, "Sorkarin a ṭul angin thawktute min pek belh a, hmanraw leina tur sumte min pe," a ti. Border Check Post Module hi nimin khan hman ṭan a ni a, Mizoram hi India rama checkpost module hmangtu state 27-na a ni.