Tuirini HEP siam dan tur sawiho

Chief minister Lalduhoma chuan nimin khan a pisaah New Development Bank, India hotute a kâwm a; Tuirini Hydro Electric Power (HEP) siam hna thawh dan tur a sawipui. Inkawmnaah hian Power & Electricity minister F Rodingliana leh mi pawimawh dangte an tel.

Sorkar thuchhuah tarlan danin, Tuirini HEP hi kawlphetha megawatt 24 siam chhuak thei tura duan a ni a, cheng vbc 676 sènna tur niin, hna thawhna tur sum chu sorkar laipui kaltlangin New Development Bank, Shanghai aṭanga pûk tur a ni.

Tuirini HEP siam hna ṭan turin Empowred Committee din a, chumi zawhah Project Management Consultancy thlan tur a ni a; chu'ngte chu chak taka kalpui mek a ni. Sorkar laipuiin a pawmpui chuan tender tihchhuah theih a ni ang.

Preliminary Project Report chu sorkar laipuia Department of Economic Affairs-ah September 2024 khan thehluh a ni tawh a, MNRE, External Affairs leh NITI Aayog aṭanga phalna lak ngaite chu lak tawh a ni bawk.