LADC inthlanah vote thlak a ni dawn ta

Lai Autonomous District Council (LADC) member of district council (MDC) inthlanpui vawi 12-na chu vawiin hian neih a ni dawn ta a, zing dar 7 aṭanga tlai dar 4 thleng vote thlak a ni ang.

LADC inthlanpui buaipuitu tur polling official team 111 chuan nimin khan an duty-na tur polling station an pan kim. Hmun kilkhâwr leh tlawhpawh harsa deuha duty tur team 59-te chuan December 1 khan Lawngtlai chhuahsanin an duty-na tur an pan a; hmun hnai deuha duty tur team 52-te chuan nimin khan an awmna tur an pan ve leh a ni.

LADC-ah hian MDC bial 25 a awm a, candidate mi 80 an awm. State sorkara rorel lai ZPM chuan bial tinah candidate an nei a, MNF-in seat 20, Congress-in seat 14 leh BJP-in seat 10 an chuh a; independent candidate mi 11 an awm bawk.

LADC inthlanpuiah hian chuh turin mi 82-in hming an pe lut a, mi pahnih - independent-a nomination thehlut ve ve an inhnuhdawh avangin candidate 80 an awm ta a ni.

Vawiin hian zing dar 7 aṭanga tlai dar 4 thleng vote thlak hun hawn a ni dawn a, vote thlak ṭhat ngai a awm chuan naktukah thlak ṭha a ni ang. December 9 zing dar 8 aṭangin vote chhiar a ni dawn a, December 12, 2025-ah chuan inthlan kaihhnawih thil zawng zawng zawh vek tawh tur a ni.