Laltlanzova hnenah huaisen chawimawina hlan

Home minister K Sapdanga chuan nimin khan a pisaah India rama huaisen chawimawina Jeeven Raksha Padak Award 2025 dawngtu Laltlanzova, Tlangsam, Champhai district chu Award a hlan. Award hian tangkapui, thuchei leh Rs 1,00,000 a keng.

Jeeven Raksha Padak hi Ministry of Home Affairs pek a ni a, chhiatna leh chetsualnaa mi nunna chhan chhuaktu mi huaisen bikte hnenah hlan ṭhin a ni.

Laltlanzova hian September 7, 2024 khan Khawzawl district-a Dulte daia ft 50-a thûk Dilmawiah tuitla an awm tih a hriat veleh chhan turin tuiah a zuang lut a, tuitla chu la chhuakin a chhan him a; hei vang hian Jeevan Raksha Padak hlan a ni.

K Sapdanga chuan, Laltlanzova chu ṭhangtharte tan entawn tlak a nih thu sawiin, "Mizote'n kan ngaihhlut em em chu mi huaisente an ni a, pi pute hun aṭang tawha kan thupui ber pakhat pawh 'ṭhian chhan thih ngam' tih a ni. Mid angte nun chhanna atana mahni nun thàp ngam mi huaisen kan nei leh India ram pum huap chawimawina dawng thei kan nei hi a ropui tak zet a ni," a ti a; ṭhian chhan thih ngam rilru chawi nung thar leh turin ṭhalaite a sáwm bawk.

Champhai bawrhsap Mohammad Aaquib pawhin thu sawiin, Laltlanzova chet dan chu chawimawi phu a nih thu leh Mizote huaisenna fakawm a tih thu a sawi. Inkhawmah hian Home joint secretary V Lalduh-zuala, under secretary Lalnunmawia Chhangte leh superintendent F Zodinpuia te pawhin thu an sawi a ni.

Jeevan Raksha Padak hi India mi tawh phawt hnenah hlan theih niin, kum 1961 aṭangin pek ṭan a ni a; category pathum - Sarvottam Jeevan Raksha Padak, Uttam Jeevan Raksha Padak leh Jeevan Raksha Padak te a awm. Sarvottam Jeevan Raksha Padak-in sumpai Rs 2,00,000, Uttam Jeevan Raksha Padak-in Rs 1,50,000 leh Jeevan Raksha Padak-in Rs 1,00,000 a keng a ni.