KHAWTHLIR

Raj Bhavan aiah Lok Bhavan

Mizorama Governor chenna Raj Bhavan chu Lok Bhavan tia thlak a ni. Ministry of Home Affairs aṭanga November 25, 2025-a hriattirna tihchhuah bawhzuia Mizoram Larsap thupek angin Raj Bhavan tih chu Lok Bhavan tia thlak a ni a; Governor chenna chu Lok Bhavan tia sawi leh ziah zel tawh tur a ni.

Thisen pe

ZMCH Evangelical Union chuan nimin khan ZMCH Blood Bank-ah thisen pek an huaihawt a, thisen unit 52 pein, petute mipa 39 leh hmeichhia 13 an ni.

Mizoram Calendar

Mizoram Calendar 2026 chu siam zawh a ni tawh a, vawiin aṭangin chawhma dar 10:30 leh tlai dar 4 inkarah IPR Directorate Lianchhiari Rûnah leh district tina IPR office-ah lei theih a ni ang. Calendar hi Rs 70 man a ni a, pawisa fai pek tur niin, online (UPI) payment tih theih a ni lo.

MRB branch hawng

Mizoram Rural Bank general manager (Business) Saibal Kanti Roy chuan nimin khan Phúrà khuaa MRB branch din thar a hawng. MRB hi September 27, 1983-ah din a ni a, Phura Branch hi MRB branch 106-na a ni. Saibal Kanti Roy chuan, bank thar chu Phúrà leh a chhehvel khaw mipuite'n an chhawr ṭangkai a, hmasawnna an neih phahna a nih a beisei thu a sawi.

Natna punlun thut hmachhawn inzirtir

Mizoram Health Systems Strengthening Project (MHSSP) chuan December 1, 2025 aṭang khan Planning conference hall-ah khuarel chhiatna leh natna punlun thut hmachhawn dan tur zirhona an buatsaih a, MHSSP project director Dr Lily Chhakchhuak-in a hawng. Zirhona hi December 5 thleng neih tur a ni a, district tina CMO office aiawh, Aizawl leh Lungleia Civil Hospital aiawh leh district hospital tin aiawhte an tel a ni.

Khawzawl chanchin

Khawzawl College-a History department-in Khawzawl an zirchianna, 'A Study of Various Localities in Khawzawl Town' tih lehkhabu chu nimin khan Khawzawl College multipurpose hall-ah PHE executive engineer Liantluanga Chawhte-in a tlangzarh.

Zirlai venhim zirho

SCERT Directorate chuan nimin khan Mamit district-a high school zirtirtu hmeichhiate pualin Mamita IPR Auditorium-ah 'Advocacy programme on Girl’s issue and Concern for Lady Teachers' an buatsaih a, zirtirtu 35 an tel. SCERT joint director Dr Lalduhawmi Thomte-in zirlaite venhimna leh enkawlna kawnga zirtirtute pawimawhna hrang hrang leh ṭan lakna turte a sawifiah a ni.

DC hoin ṭhukhawm

Serchhip bawrhsap Paul L Khuma kaihhruaiin nimin khan District Transformation Programme an ṭhukhawm a, sorkar department hrang hrang hotute an tel. Serchhip district dinhmun zirchianna (District Baseline Profile) changtlung siam a nih theih nan district hmasawnna tur hmathlir (vision) leh data-te kimchang zawkin December 5, 2025 ral hma ngeiin thehluh leh ni se, an ti.