ZPM sorkar hmasawnna hnathawh a ṭha - Prof. Lalnilawma

Minister of state Prof. Lalnilawma chuan, Mizorama sorkar kal tawhte sorkar hun chhunga an hnathawh dan enin, ZPM kaihhruai sorkar kum hnih la tling lo chhunga hnathawh chu a ṭha hle niin a sawi.

Prof. Lalnilawma hian nimin khan a bial chhunga Selinga YMA Hall panna kawng leh Thingsul Tlangnuam futsal ground a hawnnaah thu sawiin, chief minister Lalduhoma kaihhruaina hnuaiah minister leh sorkar hnathawkte’n mipui tan theihtawp an chhuah thu a sawi a, "Duhthusamin thil kal duak duak thei lo mah se, hmasawnna hnathawh a ṭha thawkhat. A bikin thingtlang lama kan kut hnathawkte’n rate hre sain sawhthing an ching thei ringawt pawh hi hmasawnna nasa tak a ni," a ti.

Ṭhalaite ruihhlo lakah an fihlim theih nan sorkarin nasa takin hna a thawk tih sawiin Lalnilawma chuan, "CM leh Home minister Pu K Sapdanga ten ram dang aṭanga ruihhlo leh dan phal loh thil rawn lut tur danchah a nih theih nan theihtawp an chhuah," a ti a; ruihhlo laka ṭhalaite an fihlim theih nan hun âwl a ṭha zawnga hman thiam a ṭul thu leh kohhran leh khawtlanga tih turte ngaih pawimawh a ṭul thu a sawi.

Prof. Lalnilawma chuan, ZPM sorkar ruahman healthcare scheme ṭhatzia Mizoram mipuiin an hre mek zel tih sawiin, "He healthcare scheme hmang tawh apiangin an fak a, mi harsa leh retheite thla timuangtu a ni," a ti.