PUC-ah Korean ṭawng a zir theih dawn

Pachhunga University College leh MGH Korea chuan nimin khan PUC-a Korean ṭawng zirna hawng turin inremna thuthlung an ziak a; January 27, 2026-ah Korean ṭawng zirna ṭan a ni ang.

Inremna thuthlung hi PUC Principal conference hall-ah ziah a ni a, thuthlungah hian PUC aiawh principal Prof. H Lalthanzara leh MGH Korea aiawhin Kim Jungae ten hming an ziak.

PUC-ah hian MGH Korea-in zirtirtu a dahin Korean ṭawng a rawn zirtir dawn a, ṭawng zir tur chu beginner level a ni ang. Thla thum chhung zir tur niin, zir man Rs 10,000 a ni dawn a; PUC-in zirna hmun tur leh mamawhte a ngaihtuah bakah, zirlaite admission a buaipui dawn a ni.

Prof. H Lalthanzara chuan, hmun dangah chuan Korean beginner level course atan fee Rs 15,000 lak ṭhin a nih laiin, Mizoram tan fee tihhniam a nih thu a sawi a, "NEP 2020-ah zirna-inte chu international level-a lang thei tura ṭan la turin a duh a, Korean ṭawng zirna hawn pawh chumi kawngah chuan a pawimawh hle a ni," a ti a; zirna-in dangte nena thawhhona neih an ngai pawimawh a, Korea ram zirna-inte nen thawhhona an la neih zel a beisei thu a sawi bawk.

MGH Korea hian Canada, India leh Myanmar ramahte Korean ṭawng zirna an buaipui a, Korean sorkar aṭanga phalna nei an ni.

PUC hian October 28, 2025 khan Japan ṭawng zirna hawng turin JACEEX LL Ltd. nen MoU an lo ziak tawh bawk.