Mizo High School Thûl buatsaih a ni

Mizo High School chuan nimin khan an sikulah an zirlaite kutchhuak chi hrang hrang pho chhuahna, Mizo High School Thûl 2025 an buatsaih a, School Education director Angela Zothanpuii’n a hawng a; Mizo H/S Literature Club member-te thu leh hla ziahna 'Thûlkhung' tih lehkhabu a tlangzarh bawk.

Mizo H/S Thûlah hian zirlaite'n an thiamthil leh kutchhuak chi hrang hrang an pho lang a; adventure-zip lining, food stall, indegenious entertainment, arts & craft, beauty & wellness, house of horror leh career guidance te buatsaih a ni. December 5, Zirtawpniah khar a ni ang.

Angela Zothanpuii chuan, Mizo H/S chu sorkar sikul zinga chhuanawm ber pawl a nih thu leh zirtirtute pawh chhuanawm tak tak an nih thu a sawi a, "Tun hnaiah room chhung boruaka thil nawi zir chiang thei Hospisafe ZMCH-a present tur an siam chhuak thei hi an chhuanawm a, hetiang ti thei tura zirtirtute'n zirlaite an kaihruai hi a lawmawm hle a ni," a ti.

Mizo H/S Thûl hawnnaah hian Mizo H/S Pipe Band-in rimawi kalrem an entir a, Cultural Club-in lâm an entir bawk.